मनपा प्रशासकपदी पांडेचं...

1 min read

मनपा प्रशासकपदी पांडेचं...

निवडणूक होईपर्यंत महापालिकेवर प्रशासक कायम राहणार आहे. त्यामुळे विद्यमान प्रशासक आस्तिककुमार पांडेय प्रशासकपदी कायम राहतील असे स्पष्ट झाले आहे.

सुमित दंडुके / औरंगाबाद,दि.३० : निवडणूक होईपर्यंत महापालिकेवर प्रशासक कायम राहणार आहे. त्यामुळे विद्यमान प्रशासक आस्तिककुमार पांडेय प्रशासकपदी कायम राहतील असे स्पष्ट झाले आहे. त्यांच्या मुदतवाढीचे नव्याने आदेश काढण्याची गरज नसल्याचे सांगण्यात आले आहे.
औरंगाबाद महापालिकेची निवडणूक एप्रिल महिन्यात होणार होती. परंतु, करोना विषाणूच्या प्रादुर्भावामुळे ही निवडणूक पुढे ढकलण्यात आली आहे. महापालिकेवर एक मे पासून शासनाने प्रशासक नियुक्त केला. नियुक्तीचे आदेश २९ एप्रिल रोजी काढण्यात आले. नवीन कायद्यानुसार स्थानिक स्वराज्य संस्थेवर सहा महिन्यांसाठी प्रशासकांची नियुक्ती करता येते. परंतु, करोना आजाराची स्थिती लक्षात घेता शासनाने २९ एप्रिल रोजी काढलेल्या आदेशात प्रशासकांच्या नियुक्तीचा कालावधी नमूद केलेला नाही. त्यामुळे सहा महिने संपल्यानंतर प्रशासकाचा कालावधी संपेल, असे मानले जात नाही. जोपर्यंत महापालिकेची निवडणूक होत नाही तोपर्यंत प्रशासकांची नियुक्ती कायम असेल. त्यामुळे आस्तिककुमार पांडेय पालिका प्रशासकपदी कायम असतील, असे स्पष्ट झाले आहे.