महाराष्ट्र नवनिर्माण सेनेचे प्रमुख राज ठाकरे यांची एक मे रोजी औरंगाबादेत सभा होत आहे. त्यापूर्वीच पक्षाला मोठा धक्का बसला आहे. माजी जिल्हाध्यक्ष सुहास दाशरथे हे भारतीय जनता पक्षात प्रवेश करणार आहेत. आज मंगळवारी विरोधी पक्षनेते देवेंद्र फडणवीस यांच्या उपस्थितीत ते भाजपमध्ये प्रवेश करणार आहेत. काही महिन्यांपूर्वी राज ठाकरे यांच्या औरंगाबाद दौऱ्यात सुहास दाशरथे यांची जिल्हाध्यक्षपदावरुन हाकलपट्टी करण्यात आली होती.
सोशल मीडिया आणि प्रसारमाध्यमांमधून नेमके आपले काय चुकले हे सांगावे, अशी विनंती दाशरथे यांनी केली होती. मात्र त्याला मनसेकडून कोणताही प्रतिसाद मिळाला नाही. त्यानंतर पक्षातील त्यांचे चार समर्थक पदाधिकाऱ्यांचीही हाकलपट्टी करण्यात आली होती.