मुंबई : शिवसेनेच्या नेत्या दीपाली सय्याद यांनी भाजपचे प्रदेशाध्यक्ष चंद्रकांत पाटील यांच्यावर जोरदार टीका केली आहे. नुकतेच चंद्रकात पाटील यांनी राष्ट्रवादीचे खासदार सुप्रिया सुळे यांच्यावर तीव्र शब्दांत टिका केली होती. राजकारणात तुम्ही कशाला आहात, स्वयंपाक करायला जा,’ असे चंद्रकांत पाटील म्हणाले होते. आता याच वक्तवाच्या पार्श्वभूमीवर शिवसेना नेत्या दीपाली सय्यद यांनी चंद्रकांत पाटलांवर जोरदार हल्लाबोल केला आहे.
दीपाली सय्यद यांनी आपल्या ट्विटर अकाऊंटवरून याबाबत ट्विट करत म्हटलं की, “मोदींनी मसनात जा, शहांनी मसनात जा, वाढती महागाई, दरवाढ आटोक्यात येत नसेल तर हिमालयात जाऊन संन्यास घ्या” असं दीपाली यांनी आपल्या ट्विटमध्ये म्हटलं आहे.
मोदींनी मसनात जा, शहांनी मसनात जा,
वाढती महागाई , दरवाढी आटोक्यात येत नसेल तर हिमालयात जाऊन संन्यास घ्या. @ShivSena @NCPAMumbai @bjpsamvad @supriya_sule— Deepali Sayed (@deepalisayed) May 26, 2022
काय म्हणाले होते चंद्रकांत पाटील?
“मध्य प्रदेशचे मुख्यमंत्री शिवराज सिंह चौहान यांच्याशी ओबीसी आरक्षणासाठी संपर्क केला पण त्यांनी दिल्लीत जाऊन काय केले हे सांगितले नाही”,अशी प्रतिक्रिया सुप्रिया सुळे यांनी पत्रकारांशी बोलताना दिली होती. त्यावर चंद्रकांत पाटील यांनी जोरदार टीका केली. “तुम्ही राजकारणात कशासाठी राहता, घरी जा, स्वयंपाक करा. ओबीसी आरक्षण मिळवून देण्यासाठी दिल्लीत जा अन्यथा मसणात जा. पण आरक्षण द्या. तुम्ही खासदार असून तुम्हाला एका मुख्यमंत्र्याची भेट कशी घ्यायची हे कळत नाही?” अशा शब्दांत चंद्रकांत पाटील यांनी सुप्रिया सुळेंवर टीका केली होती.
सुप्रिया सुळे काय म्हणाल्या होत्या?
‘‘दिल्लीत कोणाच्या बैठका झाल्यानंतर मध्य प्रदेशात ओबीसी आरक्षण देण्याबाबतचा निकाल लागला’’, असा सवाल खासदार सुप्रिया सुळे यांनी केला होता. तसेच दिल्लीत गेल्यावर केंद्र सरकारला याबाबत प्रश्न विचारणार असल्याचे सुळे यांनी म्हटले होते. “ओबीसी आरक्षणासंदर्भात आपण एकत्र लढायचे असे ठरले होते. मध्य प्रदेशचे मुख्यमंत्री दिल्लीला गेले. दोन दिवसांत असं काय त्या सरकारने केले आणि दिल्लीत बैठक झाली आणि त्यांना न्याय मिळाला आणि आपल्यावर अन्याय झाला. याचं उत्तर मी केंद्र सरकारला विचारणार आहे. मध्य प्रदेश बाबत जो निर्णय दिला आहे तो अंतिम निर्णय नाही. त्यामुळे हे जे सांगत आहे की मध्य प्रदेशला जमले आणि तुम्हाला जमले नाही यातही खोटेपणा आहे,” असं सुप्रिया सुळे म्हणाल्या होत्या.